Agora é a túa quenda.
Le atentamente as normas.
Guión para “Trax II”
Nesta actividade imos repasar o uso e a colocación dos pronomes persoais. Para facelo dunha maneira máis divertida e creativa, imos contextualizar o traballo na curtametraxe Trax II. Antes de comezar a actividade pasarase un pequeno cuestionario tipo test para coñecer o punto de partida (sen medo). Ao rematar, volverase realizar outro cuestionario similar para comprobar o aprendido e ver os avances. ✨É básico plasmar todo o esforzo e traballo realizado nunha proba escrita. De xeito organizado e sistemático, antes e despois do traballo, co obxectivo de avaliar en que medida melloramos.✨ E ademáis, como premio final ao esforzo e talento, a sorpresa de ver o resultado rematado e ben feito.
O obxectivo será escribir unha pequena escena de guión cinematográfico, inspirada nun momento moi especial da historia.
Atende as indicacións específicas do profesorado especialista na súa área ou materia que propón esta actividade: galego, latín, castelán…
1. A situación da escena
A escena que ides escribir corresponde ao momento culminante da historia:
- Tres personaxes: dous nenos e unha nena.
- Os protagonistas atopan a caixa de Tinchu.
- Xa teñen a chave, pero abrir a caixa pode traer sorpresas, problemas, momentos divertidos ou gags inesperados.
- O momento debe resultar máxico, emocionante e tamén divertido.
Podedes inventar anécdotas, pequenos accidentes, bromas ou situacións inesperadas que fagan a escena máis interesante.
2. Como debe ser o texto
O voso texto debe ser semellante ao exemplo que veremos na aula e debe seguir a estrutura dun guión de cine.
Nun guión é importante incluír:
1️⃣ Descrición da escena
- Descríbese o lugar onde ocorre a acción.
- Explícanse os detalles do entorno (luz, sons, obxectos, ambiente…).
- Todo debe estar ben detallado para que quen lea o guión poida imaxinar perfectamente a escena.
2️⃣ Acción e linguaxe non verbal
- Debedes describir os movementos dos personaxes.
- Tamén as emocións que expresan co corpo: miradas, xestos, nerviosismo, sorpresa, medo, curiosidade…
- Estes detalles son moi importantes porque no cine moitas emocións transmítense sen palabras.
3️⃣ Diálogos
- Nun guión os diálogos son curtos e reducidos.
- Só se fala cando é realmente necesario.
- A maior parte da historia explícase a través das accións e das emocións dos personaxes.
3. Uso dos pronomes persoais
Durante o texto debedes:
- Utilizar correctamente os pronomes persoais.
- Escribilos noutra cor para que se poidan identificar facilmente.
4. Análise dos pronomes
Ademais do guión:
- Nunha folla separada, debedes analizar os pronomes persoais empregados.
- Indicade, por exemplo:
- que pronome é
- a quen ou a que substitúe
- a súa función na frase
5. Tempo para realizar a actividade
Teredes aproximadamente 7 días / sesións de clase para:
- escribir o guión
- revisalo
- corrixir posibles faltas de ortografía
- presentalo correctamente
6. Presentación do traballo
O traballo debe entregarse:
- ben presentado
- sen faltas de ortografía
- co uso correcto dos pronomes persoais
- coa folla de análise incluída
7. Un reto especial ?
Os traballos que, ademais de estar correctos:
- teñan boa presentación
- mostren creatividade
- inclúan humor e ideas orixinais
formarán parte dunha selección final.
Entre esas propostas escollerase a escena que finalmente se gravará, e poderemos ver o resultado o día da estrea da curtametraxe.
O alumnado do obradoiro “Creatividade no cine” do CEP Altamira xa estivo pensando neste momento da historia. Entre todos e todas aportaron moitas ideas sobre o que pode haber dentro da caixa de Tinchu: obxectos misteriosos, ou mesmo elementos máxicos que poden cambiar o rumbo da escena.
Agora tócanos pensar tamén posibles problemas de última hora xusto no momento de abrila: quizais a chave non xira ben, a caixa fai un ruído estraño, alguén ten medo do que pode aparecer dentro ou pasa algo inesperado que crea un momento divertido.
Podedes engadir novas ideas, pero o máis importante será describir moi ben as reaccións dos personaxes: a sorpresa, algún desencontro que remata cun acordo, os nervios, a curiosidade, a emoción ou mesmo o medo. Esas reaccións, expresadas a través dos xestos, as miradas e os movementos, farán que a escena resulte máis interesante, divertida e sorprendente.
✨ Agora toca deixar voar a imaxinación…
Que problemas poden aparecer ao abrila?
E que momento máxico pode ocorrer xusto despois?
