Na semana do 23 de outubro terá lugar a presentación simultánea do TRAX II nos auditorios de Tui e Salceda, un momento moi especial que marca a culminación dun longo e apaixonante proceso de creación colectiva. Posteriormente, realizaranse diferentes pases noutros centros educativos para compartir esta experiencia e celebrar que, por fin, conseguimos reunir todas esas ideas disparatadas, creativas e brillantes que facían falta para completar esta magna obra.
E si, entre risas, poderiamos dicir que levou case tanto tempo —ou pouco menos— ca construción das pirámides de Exipto. Pero as cousas que realmente pagan a pena requiren tempo. Escoitar o alumnado con atención, dar valor ás súas voces, acompañar cada proposta con agarimo e transformar as súas achegas nun proxecto común é un camiño que non admite présas.
O esforzo constante, a ilusión compartida e a aprendizaxe vivida ao longo do proceso son tan importantes como o resultado final. Porque crear xuntos é, en si mesmo, unha das maiores recompensas. ⭐❤️🎶
